其實，過咗咁耐，小編最懷念嘅係細細個時每日返完學，返到屋企食住個菠蘿包，開住電視睇卡通片。講起卡通片，唔知而加仲有無人睇芝麻街呢？
芝麻街呢排加咗新角色，係一個叫Julia嘅女仔。
佢同其他小朋友外表無分別，但其實佢係一個有自閉症嘅角色。佢可能平時好難表達情緒、仲要唔係咁識得同人相處，會成日都做出一啲重複嘅動作。
加入呢個角色嘅原因係因為想觀眾明白有自閉症嘅人嘅需要，而且可以知道點樣可以同佢地相處。
小編表示心受感動，尤其香港社會催迫到香港嘅小朋友為咗競爭而有時忘記去愛身邊嘅人，或者見到有特別需要嘅人，反而唔識處理。
真心認為芝麻街係一套高質嘅卡通片，平時啲製作人會同兒童心理學家去討論有咩主題適合小朋友，所以要大家要多多支持呀！
圖片來源：網上
撰文：Gloria Leung
