第36屆香港電影金像獎將會喺4月9日舉行，今次啲電影都好出色，好多獎項都未知鹿死誰手，今日小編就同大家一齊估下邊個會攞獎啦～
1. 最佳電影
侯選名單：《樹大招風》、《七月與安生》、《美人魚》、《點五步》、《寒戰II》
小編心水：《樹大招風》
《樹大招風》故事背景喺1997年主權移交在即嘅香港，講述當時三大賊王季正雄、葉國歡、卓子強嘅犯罪經歷，反映喺轉變之中，三人心緒點遭受衝擊。
劇情就唔講咁多，費事劇透啦。呢套戲講嘅表面上係三大賊王嘅故事，其實亦係講緊每個香港人嘅故事，由英國殖民地變成「中國人」，每個香港人都有唔同轉變，好多觀眾都話愈睇愈感慨～《樹大招風》之前已經喺「香港電影導演會年度大獎」拎咗最佳電影，唔知今次金像獎會唔會再下一城呢～
2. 最佳男主角
侯選名單：梁家輝《寒戰II》、吳鎮宇《脫皮爸爸》、任賢齊《樹大招風》、林家棟《樹大招風》、余文樂《一念無明》
小編心水：林家棟《樹大招風》
男主角係林家棟同余文樂之爭，之前好多網民都支持林家棟拎男主角，因為覺得佢啲表情做得好細膩。但《一念無明》上咗之後，好多網民都大讚余文樂表現得好好，完全估唔到佢喺chok外仲真係識做戲，佢地都話唔識揀呀！不過小編就希望林家棟可以拎，佢做咗咁多年戲，應該俾個獎佢鼓勵下佢啦～
3. 最佳女主角
侯選名單：湯唯《北京遇上西雅圖2 之不二情書》、惠英紅《幸運是我》、馬思純《七月與安生》、周冬雨《七月與安生》、鮑起靜《大手牽小手》
小編心水：惠英紅《幸運是我》
紅姐完全演活咗腦退化症病人，佢嘅精湛演出令人拍案叫絕，同陳家樂嘅互動就好似真母子咁，令人一路睇一路喊到收唔到聲。
4. 最佳男配角
侯選名單：吳孟達《導火新聞線》、曾志偉《一念無明》、秦沛《北京遇上西雅圖2 之不二情書》、姜皓文《樹大招風》、廖啟智《點五步》
小編心水：姜皓文《樹大招風》
呢個獎真係最難分難解，全部都係有實力保證嘅老戲骨，好彩我唔係評審，如果唔係都唔知投邊個好～小編投姜皓文純粹係因為感激佢咁多年對香港電影業嘅貢獻，十套戲八套有佢份，但咁多年嚟都無獎項肯定，付出咗咁多都希望佢有回報。
5最佳女配角
侯選名單：張雨綺《美人魚》、廖子妤《骨妹》、方皓文《一念無明》、金燕玲《一念無明》、文詠珊《寒戰II》
小編心水：金燕玲《一念無明》
小編覺得呢個獎係方皓文同金燕玲之爭，兩個都發揮得好好，亦令觀眾更明白余文樂點解會搞成咁。但金燕玲始終係老戲骨，陣戲味真係湧哂出嚟，每一個動作表情都完美無暇呀！
6新晉導演
侯選名單：黃進《一念無明》、曾國祥《七月與安生》、文偉鴻《使徒行者》、羅耀輝《幸運是我》、陳志發《點五步》
小編心水：黃進《一念無明》
呢個真係毫無懸念，作為一個新導演可以拍到套戲咁有結構；咁觸動人心；咁有反思空間真係唔容易，如果黃進拎唔到新晉導演，我相信全香港人都會跌眼鏡。
小編唔係專業影評人，純粹從一個普通觀眾嘅角度評論，唔知大家又有咩心水呢～4月9日大家記住喺屋企坐定定睇金像獎頒獎典禮啦～
圖片來源：網上
撰者： Kinnie
