法國太空醫學研究所 (Medes) 為咗了解失重環境會對人體產生有咩影響，徵求24位20至45歲嘅男性參與實驗。兩個月內，實驗者嘅日常起居飲食都必須喺床上解決，冇得落床。
呢個實驗嘅目的係要模擬國際太空站嘅失重環境對人類身體有咩影響，並希望可以搵到解決方法。24位男性實驗者必須唔食煙、唔會有過敏反應，以及BMI值要係22至27之間。負責實驗嘅Arnaud Beck 博士表示，實驗者要喺失重環境應付日常起居，實驗期間做咩都得，不過至少要一邊膊頭要喺床上面。完成兩個月實驗後，參與實驗嘅人就可以收到1萬6000歐元 (約13萬港幣)。
雖然工作話就話只係需要訓喺度，不過實驗都有一定嘅危險性，期間可能會有血壓下降、暈等情況出現。實驗結束後，參與實驗嘅人可能會出現骨質密度下降、肌肉無力等身體影響，就好似太空人一樣。
消息一出有好多網友笑言呢份訓住賺錢嘅工係 Dream job，不過小編就覺得其實日日訓喺度仲攰，簡直係折磨！
圖片來源 : Medes
撰文 : Amber
