喺呢個過度重視外表嘅社會影響下，人人都係外貌協會會員。不論係先天定後天，總之樣靚身材正就係人生羸家，難怪而家咁多人整容啦。
日本網絡節目《醜女電視》(「おぎやはぎの『ブス』テレビ」)，每星期會討論各個有關醜女嘅社會議題。節目每次都會就主題到街頭訪問路人醜女有咩特徵、對她們嘅看法，同時間都會請幾位自認「醜女」嘅女仔上節目分享感受。
早前有一集嘅主題就係「飲酒聚會時會遇到嘅醜女」。
女性對「醜女」嘅意見都比較中肯。有路人表示最討厭嘅唔係外貌嘅醜女，而係啲扮唔識飲酒然後要男仔照顧嘅女仔。同時都有女性路人認為醜女通常都好鬼主動，飲多兩杯就「借醉行兇」，借醉扮癲扮玩得，目的只係想吸引異性注意。
同時都有女受訪者認為最醜嘅人係以為自己最靚而睇唔起其他人嘅女仔。
而男士們對「醜女」嘅意見就真係狠到呢......
有男性路人表示：「最討厭嘅一點就係明明我用平常心對待佢，但可能因為醜女比較少人對佢哋好，所以就以為人哋對佢有好感、想追佢。唔係囉好冇！」
「明明就係醜女，畀錢時完全冇意慾拎銀包出嚟，老馮要人請食飯。既然係醜女，希望食飯時可以自己畀返錢啦！」
有男性路人表示聚會時會想同可愛嘅女仔傾多陣計多啲，「醜樣就唔好出聲，乖乖地飲你嘅酒啦！」
一眾路人對醜女嘅comment真係又狠又直接。其實人醜冇罪架啫，有邊個唔想自己天生麗架啫。(嗚啊！！！) 內在美有時更重要架！
圖片來源 : Youtube
撰文 : Amber
