而家嘅年代好似個個都鐘意打機，但其實仲有好多桌上遊戲好好玩架！以下小編精選咗五款桌上遊戲介紹比大家！一齊睇下啦～
企鵝破冰 (Penguin Trap)
最近小編喺Facebook度見到有個婆婆玩緊一個鑿冰嘅遊戲，原來而家日本好興玩呢個！不論老人家，小朋友抑或大細路都一定岩玩！
玩法係首先將藍色同白色嘅冰塊裝好，之後將企鵝放喺中間，用轉盤決定要敲打嘅冰塊顏色同數量，輪流鑿冰直到企鵝跌落黎就為之輸！
呢個遊戲刺激嘅地方係當你鑿冰嘅時候，旁邊嘅冰有可能連帶咁跌，令企鵝仔跌落黎～感覺就好似玩層層疊隨時會冧！
| {youtube}VOVwLIi6aA4{/youtube} |
售價不等，因為小編暫時未見大型玩具零售店有得賣，反而網購就有好多～大家不妨問下Google大神～
古惑馬桶 (Toilet Trouble)
呢個遊戲名副其實係有個古惑嘅馬桶！各位玩家要輪流沖廁～玩法好簡單，首先將馬桶倒滿水，然後輪流轉動旁邊嘅廁紙筒，廁紙筒上嘅數字代表你要沖幾多次廁所！
拉下個水箱掣會有「呼啦」嘅沖廁聲響起，馬桶會隨時噴水，小心比佢噴到正一正呀！
小編認為如果係幾個大人可以玩加強版，唔係倒水落馬桶，而係倒咖啡、汽水之類一定更刺激呀～
| {youtube}MMAs4dbbCoM{/youtube} |
售價: $199.9（玩具反斗城、City Super、奇趣天地、各大書局有售）
瘋狂忌廉機 二人激鬥版 (Pie Face Showdown)
呢個遊戲係二人對戰，首先要各自將臉托喺部機個臉托上，然後鬥快不停按掣，手掌拍會向按得慢嘅一方移動， 邊個手快就可以避免成臉忌廉！
不過小編覺得如果大人玩就最好用剃鬚膏取代忌廉，始終易洗啲又唔會浪費食物吖嘛～
就連阿SA都玩得勁開心！
| {youtube}gSjYlWno_Tk{/youtube} |
售價: $249.9（玩具反斗城、AEON、一田百貨、大眾書局、City Super等有售）
家有惡犬
簡單黎講，玩家係要做賊～靜靜雞偷走狗狗啲骨！
首先每人抽一張牌，如果抽到藍色骨頭一塊，就用夾喺狗兜入面夾一塊藍色骨頭出黎，過程中如果驚醒咗狗狗比佢咬到就要淘汰，最後再睇下邊個夾到最多狗骨就係最後羸家
| {youtube}EqCnY6x9RSs{/youtube} |
售價: $199.9（玩具反斗城有售）
漢堡包遊戲 (Burger Mania)
首先玩家要先抽卡，再用夾將唔同配料組合成卡上指定嘅漢堡，呢個遊戲難度在於要喺漢堡跌出輸送帶之前完成成個漢堡。
配料如果跌咗就要到下一輪先可以再用，即係一跌就要砍掉重練，而且輸送帶仲可以較快架！鬥快整到七個完整漢堡就為之贏！
不過...睇片黎講，整一個都好似好有難度～所以呢個遊戲應該會同朋友玩到集體抓狂哈哈！！
| {youtube}BLV6RZCAjNU{/youtube} |
售價: $199.9（玩具反斗城有售）
其實無論玩啲咩，一家人或者一大班朋友都應該多啲聚埋一齊增進感情，放低你部電話，唔好再做低頭族喇～
圖片來源: 網上
撰文: Msrachel
