嗱，一個人過情人節嘅感受，小編真係明架，曾幾何時小編都係單身狗，都係自己一個孤伶伶咁過情人節。所以仍然單身嘅你，唔使覺得慘架，小編諗到啲活動，大家不妨參考下喎～
1. 炒散返工搵外快
雖然小編唔認同，但可能呢個世界真係有錢有情人，但係小編就覺得多個錢傍下身，喺任何時候都係百利而無一害嘅～
既然情人節無街去，又唔想自己一個過咁慘嘅，不如去啲炒散app度R返份散工做下，咁你就一定有個充實嘅情人節喇！
FF啲講句，可能你去炒散會識到一啲一樣為咗避節而返工嘅單身異性添呀～
2. 做下孝子帶兩老慶祝
通常上一輩嘅人都好少會慶祝情人節，作為子女喺大時大節孝敬下兩老又何妨呢？（前提係佢地唔介意你做電燈膽）
呢個做法既可以陪下屋企人，又唔使呢啲節日得自己一個過咁lonely，係咪一舉兩得先？最多佢地食情人節套餐你散嗌之嘛，who cares?!
3. 約成班朋友開Party
小編相信，喺你身邊嘅人入面，單身嘅一定唔止你一個～既然大家都無得兩個人過，不如索性一大班人過！
一齊交換下禮物，飲返杯大叫「單身萬歲！」呢個情人節就算無情人都一樣咁興奮呀！ 一於約埋你嘅單身朋友一齊開個單身Party！
4. 出去Speed Dating
正所謂「香港地機會處處」，可能勇敢啲出去參加下Speed Dating，就會識到你嘅另一半，成功脫毒出POOL真係近在咫尺呀！
咪以為Speed Dating 一定係好死板咁兩個人坐定定，可以好似圖入面兩位主角咁cosplay 下，甚至小編有見過Speed Dating係一齊整野食架！
整野食過程入面仲可以順便觀察下對方識唔識煮返幾味，保障你日後個五臟府，唔使飲雞翼魚蛋湯！
5. 做返個小毒毒
不過咁...呢個世界真係有種人係點都唔會出到POOL，點解？因為佢地天生就是小毒毒！如果你自認係呢類人嘅話，小編都無謂多講喇！
到你六十歲嘅時候，毒根深種之時，可能你都會好似呢個叔叔咁，同Mary雙雙對對架喇～ Mary仲保證專一，對你一條心添呀！
最後小編希望單身嘅朋友，早日出POOL！今年唔得可能下年就會得！最緊要係唔好放棄！<3
圖片來源: 網上
撰文: Msrachel
