呢位畫家叫Endre Penovac，係一位塞爾維亞畫家，佢由1981年已經開始攞自己嘅作品去參加展覽，仲去過唔同國家例如係克羅地亞、德國、法國等地方參展，佢仲攞過好多獎架，藝術造詣可以話係無容置疑呀！
今次呢個系列佢主張用最少嘅顏色及筆畫，勾勒出雞嘅各種形態，所以每幅都係黑同白，最多加少少紅色。
每一幅都係剛好畫到雞嘅形態同質感就夠喇。
所以每一筆每一劃都係有佢嘅意義。
而且可以睇到好多時佢都利用水令墨散開去達到佢想要嘅形態。
雖然以簡單為主，但都仍然顯示到雞嘅唔同神態，絕不欺場。例如呢幅入面，佢對眼炯炯有神，一睇就感覺到公雞嘅霸氣！
呢隻一睇就覺得佢啲毛好毛茸茸咁，但只係用水同墨，配合唔同筆觸就做到呢個效果！
呢隻重點就係尾部，一睇嘅感覺似係一筆過畫出黎，好似書法啲狂草咁。
之前都提過佢紅色嘅部分得好少，但只係簡單幾筆，整個雞冠已經好神似！
呢幅唔知點解小編總係覺得呢兩隻雞係一對情侶～但佢地個身係用唔同手法處理，望落感覺唔會隻隻雞都一樣樣。
＼
呢隻烏雞個身處理得特別細緻！
但呢隻上半身近乎一筆都無。
呢隻睇落都幾惡下。
呢隻就主要用水黎營造出成隻雞嘅形態。
睇過咁多幅唔知大家對邊幅最有印象呢？小編就覺得最有印象係毛茸茸果幅喇，因為小編一定做唔到呢個效果～（其實小編嘅畫功係災難級，即係果啲用鉛筆畫隻普通雞出黎都有難度哈哈！）
圖片來源: Endre Penovac
撰文: Msrachel
