Ants Public上個星期舉辦咗聖誕送大禮活動，送出110份聖誕禮物俾各位支持Ants Public嘅朋友。咁多位朋友仔留低嘅「最想要聖誕禮物」，小編全部睇過晒之後，總結咗「十大願望清單」出來，唔知又係咪你最想要嘅聖誕禮物呢?
第10位：世界和平
聖誕願望，其實都可以同身邊嘅人、甚至世界上所有人分享。「世界和平」呢句聽落好行，不過各國戰亂持續，大國之間又因為政治同經濟上嘅問題變得關係緊張，所以新一年，唔好再有任何恐襲、刺殺、難民潮，各地人民都可以和平共處。
第9位：香港有位好特首
近來城中熱話，一定係梁振英唔選擇連任同埋各路人馬開始蠢蠢欲動，意圖參選行政長官，例如葉劉淑儀、胡國興、林鄭月娥同曾俊華等人。過去幾年，香港人一直努力爭取真普選，希望2017年真係可以選個好特首出來，令整個香港回復繁榮、安定同和平!
第8位：減肥成功/食極唔肥
係咪就到聖誕節，各位朋友仔食得太多朱古力，好多人都留言要減肥，又或者要「食極唔肥」。有位朋友希望「今個聖誕吸收到嘅所有熱量，可以分發俾世界上所有有需要嘅人」嗱嗱嗱，做人唔可以咁邪惡，你應該要做返啲運動去消耗熱量，唔可以咁衰轉贈俾人。
第7位：男友醒水求婚
有位朋友話最想得到嘅聖誕禮物係「你的姓氏」，姐係叫男朋友醒水快啲娶佢。各位未嫁又忙嫁嘅姐妹們，應該tag埋你另一半，等佢醒水明白「只知道是時候拿著鮮花 將心愛預留在盟誓之下」，拖住你嘅手向你來個浪漫求婚~
第6位：脫離單身
唔少小毒毒同小毒絲嘅聖誕願望，都係想同「女神」或者「男神」過一個浪漫聖誕呢?特別有位朋友留言「如果能得到女神三次回眸一笑，我地就一定可以開花結果！」與其ff，不如用實際行動來表示你嘅愛意，話唔定會一擊即中，聖誕節就成為你哋嘅拍拖記念日:)
第5位：多啦A夢連百寶袋
得到一個多啦A夢絕對勁過出奇蛋，因為佢滿足你嘅唔只係三個願望，直頭上山下海乜都得。最多人希望得到「隨意門」，可以免貴過海唔使俾貴車費，又可以瞬間入港島，正! (港島返工嘅小編表示...我都好想要!)
第4位：身體健康
「我只想，身體健康～」歌都有得你唱，呢樣幾乎係大眾願望呀！比你擁有一切但係無健康，好味既野食唔可以食，好玩既地方又唔可以去，人生又有咩樂趣？你都唔想你身邊人「擔心得出一臉倦容」架嘛！小編記得有朋友留言擔心自己健康，希望等緊報告既你地一切安好，病左既朋友就快啲好返啦～
第3位：中六合彩頭獎
「想 我都好想好似中左頭獎 有野唔洗做 老細又吹我唔漲」當年LMF唱出咗唔少人嘅心聲，時至今日，仍然有好多位朋友想中六合彩頭獎。不過，如果你咁「好彩」係上次「5要689」果期中左頭獎，有成23.5注中，我真係恭喜你啊，獎金仲小過平時二獎，所以朋友仔們記住買六合彩都要有特別技巧架!
第2位：上樓
現今香港，有公屋住已經係人生贏家，每個月仲可以瘋狂Shopping去旅行，有私樓分分鐘仲可以做傑青，而未來岳母都會夾雞脾你食，所以唔少朋友都希望2017成功上樓，得到真正嘅安居樂業~
第1位：悠長假期
香港人生活壓力大，大部分人每日都係有返工就無放工，所以唔少人都會想放個大假去尋找一下旅行的意義，每日食玩瞓咁就咩都唔使諗唔使煩喇～不過咁，比你去到旅行又點？你咪又係要覆電話覆Whatsapp同覆Email~
圖片來源：網上
撰文：Ants Public小編們
