迪士尼既各位公主一直深受大眾喜愛，每一位都係迪士尼既標誌性人物。最近有位叫STAR影法師的插畫家就幫各位公主換新裝，著上和服既佢地一樣都係仙女咁靚，仲各自散發唔同既氣質添啊！而且每件和服細節都畫得一絲不苟，仲配合返故事內容，畫風超級唯美！
首先登場既係白雪公主！著住純白和服捧住蘋果，被雀仔包圍既白雪公主，感覺比著住公主裙更加青春，就好似一個含羞答答的少女咁，好萌啊～
《Peter Pan》入面既小仙女TinkerBell 雖然唔係公主，但都一樣有份架～好動既佢著上綠色為主既短身和服，一樣可以自由自在咁周圍飛，企喺啲花隔離，更加顯出佢既嬌小可愛！
《美女與野獸》的Belle著上黃色和服，戴住黑色毛毛頸巾同手套，捧住象徵佢同野獸之間的愛情紅玫瑰，優雅程度完全配合佢貴婦既形象～仔細一睇件和服上面畫左野獸架，而且仲畫左個圍欄，令人一諗就諗起以前野獸點樣困住Belle～小編認為呢一幅簡直係最浪漫既設計啊！
《小魚仙》既Ariel雖然係人魚公主，但都一樣可以著和服架！呢一幅以綠色為主，畫上波浪紋之餘，仲有幾條魚仔陪住Ariel，勁有大海feel啊！而且魚尾上仲有個小小蝴蝶結，好可愛啊！
《阿拉丁》入面既Jasmine著住日本和服，坐喺阿拉丁張飛毯度，真係別有一番風味～仲連膚色都變白左啊！
長髮公主Rapunzal當然有把長到見唔到尾既頭髮啦～件和服紫粉紅色同佢本身件公主裙既色好類似，一樣好可愛！
《灰姑娘》Cinderella係經典公主中的經典，著住畫有城堡既藍色和服，腳上著既係專屬於佢既玻璃鞋，即刻令小編諗起雖然灰姑娘一直都比後母同兩個姐姐蝦，但最後都搵到王子愛佢，真係好勵志又浪漫架～
《愛麗絲夢遊仙境》入面既Alice一直都比人紥紥跳又勇敢既印象，所以佢既和服都唔係傳統類型架，反而係似喺佢本身條裙上面加上和服既元素，呢套勁有少女feel！
近年大熱既Elsa公主當然有份啦～佢套和服係冰藍色，畫左花同埋雪花既圖案，再加上毛毛頸巾，一望就好有冬天感覺，勁襯Elsa公主，小朋友見到一定尖叫！
睇完幾位公主既和服裝扮，佢地各自散發個人特色真係好靚！搞到小編都少女心大爆發好想著和服啊～
圖片來源: STAR影法師 @pixiv
撰文: Msrachel
