你單身嘅原因係因為A0無拍過拖?俾女飛?係無腳嘅雀仔? 無論如何，聖誕節唔想出街逼餐死嘅，不如睇下小編介紹嘅五套自虐愛情片，或者睇完你會打俾你嘅EX/女神。
▲ 戀人絮語
雙戀、單戀、失戀、暗戀、苦戀、熱戀，《戀人絮語》入面四個故事已經包括晒以上嘅複雜關係。每段關係都係似有還無，令每個人都陷入不能自拔嘅地步，係戀愛世界當中繼續浮浮沉沉。
▲ 雙戀，其實都可以係痛苦嘅開始。
▲ 頭文字D
改編自人氣漫畫嘅《頭文字D》，由亞洲天王周杰倫飾演木納嘅超強車神藤原拓海，加上杜汶澤超爆笑又多精警對白，又有余文樂、陳冠希、陳小春等人，最重點梗係有佬味十足嘅黃秋生喇!
▲不過《頭文字D》嘅結局，唔使講，睇女主角夏樹個樣又已經明白，聽埋周董嘅「一路向北」，小毒毒好拎定紙巾!
▲ 那些年，我們一起追的女孩
當年紅爆中港台嘅《那些年，我們一起追的女孩》，陳妍希同柯震東嘅關係一直斷斷續續，亦勾起唔少人青蔥歲月嘅回憶，你又有無諗起你嘅女神呢?
▲ 「愛人結婚了，新郎不是我」，其實係好老土嘅電影橋段，但係點解會整喊咁多人呢? 最後嘅「激吻」真係唔好錯過!
▲ 戀戀風塵
呢首1986年嘅台灣電影未必有好多人識，不過講到「毒JJ自虐」系列，佢絕對係小編心目中嘅TOP5! 故事係導演吳念真嘅初戀經歷，講述佢當兵以前，女朋友準備左千幾個信封，要佢每日都寄信返去，結果...... :(
▲ 女主角辛樹芬當年並非專業演員，而係名導侯孝賢偶爾係街上發現，而辛樹芬嘅演出自然樸素，絕對令整個悲劇故事更動人心弦!
▲ 戀夏500日
愛情小品來講，呢套絕對係揪心到不得了! 到底「愛情」係點樣嘅一回事呢? 有啲人，只可以係朋友;有啲人，只可以係過客;有啲人，未必可以終老。你明白「命中註定」未啊?
▲ 戀愛，並唔係你單方面付出、瘋狂咁迷戀就會有回報。每一段戀愛能否結果，都係命中註定，唔需要強求。或者，你會係轉角處遇上另一個呢?
小編希望呢5套自虐電影令小毒毒們都明白到，每段愛情或者未能開花結果，但總算係你人生經歷中重要嘅一課，自虐完之後就應該學會「珍惜」、「體諒」同「放手」，而小編亦希望小毒毒們可以快啲搵到命中註定嘅另一半。
圖片來源：網上
撰文：陽光小毒毒
