聖誕節，係單身小宅宅最難過嘅日子。「街裡愛人一對對」，無謂眼怨嘅情況下，都係早啲返屋企食自己好過。不過成晚流流長，搵套戲睇下解悶又無idea?小編精選左五套另類電影，等你嘅聖誕節過得「特別」過人!
1. 嚎哭/灰機系列
邊個話聖誕節一定要睇開心嘅戲，小編專登揀左幾套Sad爆ending嘅戲，或者有幾套會令你喊到收唔到聲，小宅宅們注意啊!
Level 1 ◆ 開心鬼上身
你以為係鬼片?其實係笑片。你以為嚇鬼你?其實個結局出其不意到會令你爆喊，點解死過翻生嘅車太鉉會撞鬼，仲要一次撞四隻呢?
Level 2 ◆ 美麗人生
以二戰時期做背景，用悲喜劇嘅形式交代德軍對猶太人嘅逼害。兼任導演同男主角嘅羅貝托飾演爸爸，好努力咁維護自己小朋友嘅美好童年，特別係兩父子偷偷地用德軍嘅廣播咪向妻子表達愛的宣言，等佢心存希望，絕對係賺人熱淚。
Level 3 ◆ 飛越瘋人院
《飛越瘋人院》係1974年嘅美國電影，由積尼高遜做男主角，被送入瘋人院嘅男主角一直努力衝破條例規限，帶領院友們對抗瘋人院嘅惡死女看護。過程搞笑、抵死得來，仲會令你反思「體制化」之下人類嘅病態妥協，結局絕對令你睇完勁心up。
Level 4 ◆ 再見螢火蟲
呢套唔使多講，睇過嘅唔敢再睇，未睇過嘅一定喊到崩潰。二次大戰後嘅日本，一對落難兄妹，妹妹節子手上嘅果汁糖，令小編諗起都會忍唔住鼻酸一下，如果你想過一個超灰嘅聖誕節，呢套戲絕對可以雪上加霜!
Level 5 ◆ 無聲吶喊
你只需要有心理準備，隔離放定一盒紙巾，就可以過一個喊到眼腫嘅聖誕。故事內容因為改編自真人真事，講述當年轟動韓國嘅性侵聾啞兒童案。電影氣氛極之沉重，特別係校長企係廁格上面望住你笑，真係笑到你心都寒埋。（當年小編係戲院睇到爭啲想走，個心好唔舒服，已經喊到出唔到聲）
之後小編會有一連幾個唔同嘅另類電影介紹俾小宅宅們，想過一個SAD爆聖誕就要跟住呢個電影清單喇!
圖片來源：網上
撰文：陽光小毒毒
