為左慶祝電影中心20周年呢個大日子，電影中心噚日推出左神秘特備節目，唔到放映果下你都唔知自己會睇到啲咩，20蚊張戲飛咪當去電影中心玩下囉！雖然一出就已經俾人掃唒，不過仲有其他好戲等住你，最平20蚊都可以睇到經典之作！(得返小小飛，快啲約埋男女朋友老友死黨去喇！)
由12月17至23日，電影中心都會播放一套電影，20蚊戲飛但係唔話你知係咩名，唔話你知係咩類型，提示都只係「曾經係百老匯上映過」、「全部35mm」同埋「無埋翻睇你都唔會後悔」！一推出之後，所有戲飛都俾人掃得乾乾淨淨。咁有驚喜嘅睇戲，相信大家都無乜幾可遇過，絕對係「新奇、刺激、又好玩」！（買唔到飛嘅小編希望七日都係播鬼片～～）
唔緊要，就算參加唔到20周年搞嘅神秘電影特備節目，12月6日都仲有四套1996年經典電影俾你揀，同電影中心一樣20歲，所以戲飛都只係20蚊！黑色幽默《迷幻列車》、莎翁名劇《羅密歐與茱麗葉之後現代激情篇》、溫情喜劇《談談情跳跳舞》同良心首部曲《愛情中不能承受的痛》呢四套都係1996年嘅作品，其中一套更加係電影中心嘅開幕電影，仲唔快快手用20蚊去欣賞經典！（真你得返好小量戲飛）
另外，12月10至16日電影中心率先播映康城新作，雖然賣返正價85蚊，不過有得先睹為快今年獲得康城金棕櫚獎嘅《我，不低頭》都已經超值喇！仲有《神奇虎爸》同《只是世界盡頭》等住你，鐘意睇戲嘅你又點可以錯過20周年嘅好戲連場呢？
其實電影中心不時都會推出特備節目，好似1月就有「法國電影回顧展2017」，可以睇返當年梁家輝打入國際市場嘅法國電影《情人》。行完隔離嘅書店、飲杯咖啡，再睇套經典文藝電影，係咪文青嘅你都唔好錯過電影中心呢個「鬧市中嘅隱世角落」。
圖片及資料來源：http://www.cinema.com.hk / 電影中心Facebook
撰文：陽光小毒毒
