俊和發展集團同益兆興業有限公司合作嘅新樓盤「T Plus菁雋」，單位面積最細由128平方呎至763平方呎。愈整愈細嘅「豪宅劏房」，最細嘅128平方呎單位仲細過一個標準車位（135平方呎）。
俊和地產發言人指，今次嘅樓盤嘅目標買家係年輕人，而單位設計概念源於學生宿舍，呢類迷你開放式單位可以滿足年輕人需要嘅空間，亦指出「紫禁城再大，皇帝都係瞓張床」。（其實龍床有幾大，我唔講，你自己睇圖喇！想偷換概念？用得高招先好用啵！）
其實學生宿舍間房一眼睇哂，住學生宿舍只係以學期計，一年一萬幾，間房唔包括廁所、廚房、洗衫同Common。但係「菁雋」最細個單位128平方呎係包唒露台、廚房同廁所，你估一萬蚊買到幾多塊階磚？放得落張單人床同衣櫃，擺完電器之後可能行步路都辛苦過人。
不過係香港，單位面積「沒有最細 只有更細」。當你以為128平方呎嘅「豪宅劏房」已經好離譜，來緊仲有英皇國際跑馬地嘅項目，有啲單位仲細過130平方呎，住落分分鐘每日都係挑戰人體極限。小編覺得以後間屋可能連床都放唔到，只可以折墮到訓書架......
圖片及資料來源：tplus.com.hk/ uc.cuhk.edu.hk/wangchienyang.com/
撰文：陽光小毒毒
