小編以往參加party要交換禮物既時候，通常都係好簡單咁入場前將每一份禮物mark個號碼，然後抽到邊個號碼就要返相應既禮物，每次都係咁其實真係幾悶架，所以如果你係搞手，就參考下以下既唔同玩法啦～
禮物傳傳樂
首先要收集每人帶黎的禮物，然後所有人圍圈坐低。之後將禮物隨便分到每個人手上，然後就開始播音樂喇。音樂一日未停，大家都可以隨意咁將你手上的禮物同任何人交換，而且唔限次數，去到音樂一停就唔可以再交換，手上攞到咩禮物就係你今年既聖誕禮物喇。
To grab, or not to grab?
首先同樣地要將所有禮物集中埋一堆，然後抽一個人出黎揀佢想要既禮物。揀好之後係必須要打開禮物，然後展示比現場所有人睇。之後，其餘的人可以舉手“搶”禮物。第一個舉手的人就可以成功搶走份禮物，不過搶到就唔可以再參與遊戲喇。被搶走禮物的人係就係好慘，但仲有機會得到想要既禮物架！就係佢要重新揀過一份然後再攞出黎睇下有無人要“搶”。如果無人要“搶”，份禮物就袋袋平安喇。呢個玩法絕對可以輕鬆令在場人士緊張又興奮，不過就要預多啲時間玩喇！
交換禮物LOVE LINE
聖誕節咁需要溫暖既節日黎講，如果成班朋友都係單身一齊開party既，不妨喺玩法上加啲曖昧成份，話唔定會有意想不到既lovely match喎！玩法係男仔企左邊，女仔企右邊，大家各自講３個關於自己份禮物既貼士，然後各自揀你想要既禮物，當然或者係揀你想同佢交換禮物既人啦～規則係可以男揀女或者係女揀男，如果對方都一樣揀你的話，就算係成功交換禮物或者係大家都互有好感架喇！
攞得快好世界
一開始準備兩粒骰，大家圍成一個圓圈坐低，中間放一份禮物。搞手就負責擲骰，只要擲出黎，兩粒骰加埋等於“6”或者“12”，大家就要即刻衝出去搶中間份禮物。搶到既人就成功帶佢返屋企，不過攞到手之後就要退出遊戲，無得再搶架喇。如此類推，直到每人都搶到一份禮物為止，遊戲過程一定好刺激呀，不過要注意既係呢個遊戲需要大啲既地方，否則撞親或者整親就唔好啦～
Your Christmas Angel
玩法其實超級簡單，過程仲既方便，又快捷。首先要準備一個齊集參加者名既抽獎箱，然後每人入場前首先要抽出要將自己份禮物送比邊個，順便可以睇下同邊個最有緣，然後喺你份禮物上面寫低佢個名。但唔可以比對方知道你抽中左佢架～到交換禮物環節既時候，只要搵返有自己名的禮物就完成喇，攞到禮物就估下到底邊個係你既Christmas Angel 啦！
希望大家都可以玩得開心啦，Merry Christmas！
圖片來源: 網絡圖片
撰文: Msrachel
