又到聖誕～又到聖誕～每到呢個節日相信大家都會好煩惱，男朋友要煩帶女朋友去邊好，爸爸又要諗同一家大細玩咩好，都真係幾頭痕架，今次就等我為各位男士們盡返一點棉力啦！
１．赤柱聖誕變童話市集 波板糖任食
赤柱廣場搞既德國聖誕市集一直都好受歡迎，今年仲加左童話元素，為配合格林童話「Hänsel und Gretel」主題打造出一座德國童話村。今年有一座足足五米高既糖果屋，入面有成一千支八款唔同味既手工波板糖，，組成七彩水晶燈，喺指定時段更可任食波板糖，諗起都興奮呀！除左咁之外，仲有德國直送美食同手工製品，好運既話更加可以見到聖誕老人同佢影相添。
小編溫馨提示，每到週末都會有超級多人揸車入去赤柱，所以如果唔想塞住車咁揸入去，又搵唔到車位咁掃興，就記得要盡量使用公共交通工具喇！
日期：10-11/12、 17 – 18/12 (一連兩個星期六及星期日)
時間：12nn- 8pm
地點：赤柱廣場天幕廣場
２．1881巨型雪人加親子小型滑梯
今年尖沙咀 1881用雪人為主題，特登喺廣場中央起左個超巨型雪人，雪人的底部係一條小型滑梯，大人細路都瀡得架，可以同小朋友一齊玩一定好開心！另外雪人附近仲展出左唔同既雪人擺設，每個都好可愛架！ 去過1881既朋友都知道，果度仲有個小型花園，情侶黎就夠晒浪漫啦～
日期: 11/11-3/1
時間: 10am-10pm
地點:尖沙咀廣東道1881 Heritage
３．將軍澳PopCorn千萬粒星星圍住你
今年將軍澳PopCorn都為聖誕落重本架，首先用接近一百塊巨型鏡，打造左一個「炫目鏡迷宮」，比大家入去不斷喺鏡度見到自己，聽落都覺得好似好好玩之餘，仲好方便各位貪靚既朋友，可以一路照住鏡一路玩，就唔怕走樣啦！除左迷宮之外，仲設立左個鏡屋裝置叫「浪漫星海」，入到去就好似比成千上萬既星星包圍同祝福，同情人黎真係浪漫指數爆晒錶呀！小編認為如果喺度表白，可能會事半功倍架，有目標既你好快啲行動喇！
日期﹕即日起至2/1
時間﹕12nn -10pm
地點﹕將軍澳PopCorn一期一樓大舞台
入場方法: https://goo.gl/72H9c3
４．新城市廣場繼續浪漫
每年聖誕節沙田既新城市廣場，都會喺空中花園為大家送上浪漫燈飾。今年就會起一條有成三百呎長的「璃光星河 Milky Way In Town」，比大家浪漫一下。呢條星河12月1號就會亮燈，主辦單位仲邀請左好叻喺水上畫畫既藝術家畫返條星河形態出黎。亮燈前，呢條「璃光星河」既水面會呈現紫色同藍色既光影，同時會有雪花投影及水波倒影，令你同你既另一半就好似置身天上面，比星星包圍住咁，真係夠晒浪漫呀。不過咁，單身狗又唔好灰住，雖然今個聖誕無情人陪，不過都唔緊要架，要記住你唔係無情人，只係你既情人未到炸！呢度可以將載住願望的星願球放入去水入面，只要誠心許願，可能你既情人好快就出現架喇，成功出pool不是夢！
日期：1/12 -15/1
時間：10am-10pm
地點：沙田新城市廣場7樓戶外的星光花園
５．時代廣場冰雪樂園爽到震
銅鑼灣時代廣場今年搖身一變，變成聖誕雪樂園！以前成日幻想要過白色聖誕，但又無錢飛去外國過聖誕，不過今年去時代廣場就滿足晒你玩雪，掟雪球、滑雪、砌雪人等等既願望喇，玩到攰仲有軟綿綿既雪地比你攤抖下！今次呢個雪樂園費用全免，每逢週末更加有唔同既表演活動送比大家，例如係踩高蹺、胡桃夾子功夫舞、V project聖誕舞蹈表演等等，包你玩得開心又過癮呀。想見聖誕老人既就可以星期日去，仲可以乘機問佢攞禮物，親口同佢講「咪走數呀你！」。不過佢唔送比你，時代廣場送比你！只要喺時代廣場單一電子消費滿港幣五百蚊或以上，就可以參加聖誕抽獎，抽一份聖誕禮物比自己架喇！
日期：24/11-1/1
時間：10am -10pm
地點：銅鑼灣時代廣場露天廣場
小編預祝大家有個快樂聖誕喇！
圖片來源：網絡圖片、PopcornTKO@facebook、新城市廣場官方網站
撰文：Msrachel
