近日八大畢業禮一個接一個，唔少人都會上載男女朋友、家人嘅合照到Facebook或Instagram。點知昨日網上就有呢張「女神與兵」嘅合照。「女神」畢業了，但係送花送啤啤送波波嘅人，其實只係一位陪伴左右十年、「不是男朋友卻比男朋友更親更重要」嘅「兵」......唉！如果唔想「服兵役」，就要小心行每一步，否則只會永世跌入Friendzone或者當兵。（小編建議一路聽住劉浩龍嘅「緋聞男友」或者梁漢文嘅「七友」一路睇，特別有風味！）
1. 先瞭解清楚女生背景
美國愛情小品《緣來不是我女友》（What if）嘅男主角Wallace參加派對時遇上Chantry，二人相當投契，Wallace亦因而產生好感。但係，Chantry已經有男朋友了...... 每次想投入感情，意圖發展一段新戀情時，千萬要先搞清女方有沒有男朋友，唔好糊里糊塗咁將心機時間浪費。（除非你甘願做第三者/使橫手搶回來，但你係咪能成功當上新男朋友又係另一回事喇！）
2. 雙方都不要拖泥帶水
「誰都猜到 我喜歡你吧」咁又點？或者佢唔係咁覺得呢！如果你希望二人嘅關係前進一步，就唔好令關係變得拖泥帶水，剩係單方面咁對佢好，應該要令大家都正視呢段友情係咪要進一步成為愛情。若果女方都有意思，其實又點會一拖再拖呢？到底大家只係朋友定係佢當你係「兵」咋？
3. 不要讓你的好變成理所當然
「如果一早沒有當 好知己」......被拒絕以後，你哋嘅關係或者會疏遠，見面都會好尷尬，咁樣反而減低「當兵」的機會。反之，如果你繼續留係佢身邊，無限量（單方面）付出你嘅好，女方或者會視之為理所當然，咁你就會慢慢步上「服兵役」之路。無須再後悔當日表白，及早認清真相喇！
4. 不要因她的說話而心軟
未必所有女人都會收兵，但小編身邊實在太多殘酷事例。「你好好，但係我不配鐘意你」/「我唔想我地嘅關係會變，以後你唔再對我好」，呢啲說話真係「當兵」必聽嘅咁滯！其實佢地嘅意思同「我唔會同你一齊」一樣，不過係婉轉啲咁叫你繼續對佢好。唔好咁傻仔聽哂佢話，以為自己真係好重要。就算無你，仍然可以收千千萬萬隻兵，因為兵，通街都係兵。（如果無其他兵，可能係你鐘意既女仔根本唔係娘娘）
施主，小編奉勸各位「小心使得萬年船」，「兵役」唔係話唔當就唔當。如果唔係就好似今次既男主角咁，十年青春一去無回頭～～
圖片：網上圖片
撰文：陽光小毒毒
