擁有萬人迷老公碧咸、幸福圓滿的家庭，自家品牌又做得有聲有色，真係家庭、事業兩得意。最難得嘅係碧咸嫂Victoria Beckham將佢嘅幸福分享俾其他有需要嘅人，可以話係現代女性的典範。
Victoria Beckham一向致力於公益事務，自2014年開始，獲委任為聯合國愛滋病防治計劃（UNAIDS）親善大使，一直積極參與及推行關懷愛滋病活動。早前更帶埋大仔Brooklyn去肯亞親善探訪，宣揚「關注愛滋病」訊息。
12月1日係世界愛滋病日，Victoria就聯同愛女Harper Seven（哈七）設計咗兩款限量版愛心T恤為愛滋病患者籌款，透過自家品牌，提醒大眾母嬰感染愛滋的嚴重性、教育青少年預防愛滋。
其實今次已是Victoria繼2015年，第2次為世界愛滋病日設計限量T恤籌款。
Victoria 還親自示範限量慈善T恤。
哈七一向愛畫畫，Victoria就將囡囡的火柴人畫作印於T恤上，分別有大人及小童T恤兩款不同設計。
Victoria不時將囡囡畫作放上IG。
推出的兩款限量慈善T恤已在品牌倫敦店開賣，Victoria呼籲大家為慈善出力。
限量版慈善T恤於11月19日起在品牌官網victoriabeckham.com及其倫敦旗艦店發售。成人版T恤定價140美元（約$1,100港元），小童版售70美元（約$550港元），另外亦設計了兩款太陽眼鏡籌款，所得收益將捐給非洲慈善機構「Born Free Africa」。
品牌官網：www.victoriabeckham.com
撰文：Irene Leung
