之前同大家介紹咗超可愛嘅『關東煮入浴鹽』，唔知大家有無入貨呢？喺月中《萬代》再推出兩款浴鹽，分別係『美少女戰士浴鹽』同『假面騎士浴鹽』。
『美少女戰士浴鹽』
係美少女戰士變身器造型嘅浴鹽，一共有6款，唔單止造型超靚，最正嘅係產品有美容成分，好似透明質酸等保濕因子，浸完浴皮膚都唔會“掹掹緊”，啱晒貪靚嘅女士們使用。
浴鹽一包一個，好似出奇蛋咁，將玩具收藏喺球狀嘅浴鹽裡面，而款式方面係隨機抽嘅，即係要等浸浴時，浴鹽溶化後，先知道抽到咩玩具，唔知係邊個嘅變身器呢！
粉紅色的球狀入浴鹽，係漿果味。
呢款『美少女戰士浴鹽』售540日圓，今冬可以喺日本各大雜貨店、藥妝店、超市、百貨、オトナ女子美日和（東京駅一番街）、ITS'DEMO等買到！
※產品未定推出確實日期。
『假面騎士浴鹽』
喺日本大受歡迎嘅電視劇『假面騎士』浴鹽系列，一共有4款，仲可以幫佢變身，真正有得浸，又有得玩，小朋友冬天都唔怕沖涼啦！
紫色的球狀入浴鹽，葡萄香味。浴鹽溶化後，成缸水會紫紫地色，好夢幻！
呢款『假面騎士浴鹽』賣410日圓，11月中就可以喺日本全國玩具反斗城、玩具商店，各大雜貨店、藥妝店、超市、百貨、便利店等買到！
圖片來源：nlab.itmedia.co.jp / bandai-lifestyle.jp / Hobby.dengeki.com
撰文：Irene Leung
