天氣開始轉冷就會特別想浸浴或者食鍋物，如果可以兩者兼得就更好嘞！日本玩具供應商《萬代》最近就推出咗造型超可愛嘅『關東煮浴鹽』。
浴鹽一包一個，好似出奇蛋咁，將玩具收藏喺球狀嘅浴鹽裡面，而款式方面係隨機抽嘅，即係要等浸浴時，浴鹽溶化後，先知道抽到咩玩具，夠晒緊張刺激！
《萬代》由2002年開始推出一系列專為小朋友而設嘅入浴鹽『蛋系列入浴鹽』（びっくらたまご），產品一直好受歡迎。雖然係『兒童入浴鹽』，但小編就覺得無論大人細路都鐘意。
『關東煮入浴鹽』系列一共有6款經典嘅關東煮鍋料模型，包括：蘿蔔、蒟蒻拼竹輪、水煮蛋、糯米丸、章魚腳和福袋，每一款都十分精美。想像一下，同鍋料一齊泡浸，就好似自己都變咗鍋料咁樣，係咪好過癮呢！
▼鍋料模型加上鏈子就可以做吊飾了。
#蒟蒻和竹輪
#章魚腳
#水煮蛋
#蘿蔔
#糯米丸
#福袋
▼黃色球狀浴鹽，係檜木香味。浴鹽溶喺水後，黃黃地色，勁似關東煮湯鍋！
呢款『關東煮入浴鹽』售410日圓，11月初喺日本各大雜貨店、藥妝店、超市或百貨都買得到！
除左『關東煮入浴鹽』，喺整個11月，《萬代》會陸續推出不同嘅『蛋浴鹽系列』，小編會不斷為大家更新，要密切留意喇！
圖片來源：nlab.itmedia.co.jp / bandai-lifestyle.jp
撰文：Irene Leung
