喺日本某啲小社區，每日朝頭早都會有廣播體操活動。據神戶新聞報導，喺兵庫縣洲本市山手就有一位92歲婆婆已經參加一萬次廣播體操。
不論風吹雨打，幾乎日日參加廣播體操已經30年。呢位92歲婆婆米律幸子，比一般人更有恆心。為咗呢個難以達成嘅記錄，舉辦當區廣播體操嘅體育會決定頒一個獎比佢。
廣播體操每日朝早6點半會喺洲本中央公民館舉行，由50歲到90歲約有40人參加，氣氛十分和諧。米律婆婆就認為「廣播體操喺長壽嘅秘訣，早起做運動身體會靈活，心情都會唔同」。
由60歲開始因為朋友嘅邀請，加上「為咗健康」呢個理由。廣播體操成為佢日常嘅一部分，一直都無缺席。但今年嘅冬天因為身體不適入院，有打算過放棄繼續參加。但一諗到去廣播體操就可以見到朋友，就以一萬次作為目標繼續參加。
米律婆婆靠著一支拐杖支撐身體，慢慢在身體可行範圍活動。體育會嘅廣播體操代表大學義則就話「婆婆撐住拐杖都保持健康活動。佢好有精神嘅姿態，都會激勵到大家」。
其實每參加一次廣播體操，都會喺參加卡上面記低日期同蓋印。米律婆婆嘅卡一張可以記錄300日，宜家佢已經開到第34張卡，全部都好好咁保存著。雖然米律婆婆嘅朋友可能都喺中途離世，但喺佢覺得持續有佢嘅意義喺度，只要自己嘅腳仲行到就想參加落去。
新嘅一日開始，伴隨著廣播體操嘅音樂，米律婆婆嘅一日又要開始了！
撰文：Oliver Fong
