做運動做到破晒紀錄就聽得多，熱到破紀錄就近年出現得越嚟越誇張。暑假已經訂咗酒店機票嘅朋友就要小心啲喇，宜家日本熱嘅程度喺新聞會叫你中止戶外活動。
就喺琴日埼玉縣熊谷市 最高氣溫達到41.1度，係日本歷來最高嘅紀錄。熱氣即使經過一個晚上仍然殘留喺地面，令氣溫上升嘅速度加速，唔少地方喺到達中午之前就已經超過35度。而上一次打破紀錄係喺5年前，當時日本錄得最高溫係2013年8月12日，當時喺高知縣江川崎都只係錄得41.0度。
有紀錄以來最早日本錄得嘅高氣溫喺1933年7月25日當時氣溫達40.8度，之後多年來氣溫都無再被突破。時隔74年直至2007年，日本再次突破紀錄，近年亦有持續上升嘅趨勢，令人懷疑日本的氣溫係咪受全球暖化等等其他隣近地區因素影響。總而言之，喺夏天要外出嘅朋友記得要飲多啲水，小心中暑呀！
撰文：Oliver Fong
