英國切斯特動物園而家請緊長頸鹿保育員，除咗可以日日對住可愛嘅長頸鹿外，仲人工高福利好，有相關知識嘅朋友快啲報名啦!
根據招聘廣告，長頸鹿保育員一職年薪23,148.51英鎊，兌返港幣即係大約250,000，一星期工作時間40小時，雖然人工唔係特別高，但勝在福利勁好!由於職位係輪班制，如果咁啱輪到你返星期六日會有額外獎金，相比香港成日都無償加班真係勁吸引呀!而最最最吸引就係一年有33日有薪假!咁就唔洗再驚唔夠假去旅行啦!
福利咁好當然要求都唔低啦!動物園話擁有動物學相關經驗同動物園工作經驗會優先考慮，同埋亦都需要有英國駕照，而最重要當然係要愛動物啦!呢啲條件睇嚟香港人比較少符合到喎，唔知移居咗英國嘅巴絲打又有冇興趣呢～
呢份工唔單止要照顧長頸鹿，仲要負責埋平時遊客參觀同埋要代表動物園喺英國同海外出席媒體採訪同研討會，睇嚟份工真係好唔簡單呀!
申請截止日期去到1月21號，如果有興趣又符合資格就記住快啲報名啦!
圖片及資料來源:Facebook@Chester Zoo
撰者:Yee
