萬眾期待嘅《Do姐再Shopping》琴晚終於播出咗，首播就係DO姐農夫加埋翠如BB去日本玩。不出所料成集都有唔少笑位，一於同大家逐個睇！
首先喺節目入面，陸永就成日唔覺唔覺咁笑Do姐年齡。好似翠如BB話自己就快生日叫Do姐買禮物比佢，Do姐就扮聽唔到咁走開咗，陸永就講笑咁話：「好唔尊重人地生日。」「咁佢過生日嘅次數又比我地多好多。」
喺攀石環節，Do姐就好落力咁扶住翠如BB，農夫兩位就不停叫佢小心啲，陸永就大爆咗一句：「你以為你真係好多鈣咩！」
之後Do姐仲喺一個幾高嘅地方跌咗落黎都無事，陸永喺interview就話：「Do姐嘅生命力真係好似蟑螂。」
另外成集入面佢地都不改本色繼續互串，好似陸永C君兩位穿起牛仔產品行Catwalk果陣，Do姐就勁直接咁話好肉酸。Do姐唔小心講錯野話去「睇」運動，兩個就把握機會恥笑佢。
最後買手信果陣，Do姐拎起一個如果唔小心比蛇咬到、就可以幫你吸返啲血出嚟嘅產品，陸永就話依個係「陸永替代器」，意思係咪即係如果Do姐唔小心比蛇咬到，陸永就會幫佢吸返出嚟？
同埋真係唔講都唔知，玩真人mario kart賽車果陣點解陸永唔玩呢？因為佢係無車牌架，佢曾經講過佢個人方向感好差，行路都會蕩失路，成日行錯路，所以都係唔揸好過揸！
唔知今次又會創造幾多笑料、金句同埋經典埸面呢？
資料來源：tvb
圖片來源：mytv super 截圖
撰文：Yanica
