成日都聽到TVB錄影廠好猛鬼，事實又係咪咁呢？周海媚喺最新個集《最佳拍檔》講咗幾個喺錄影廠同拍外景嗰陣遇到嘅靈異事件。
1. 八廠女廁有鬼？
周海媚話有次去八廠女廁嗰陣，度度門都鎖住開唔到。終於有度門無鎖，佢好大力推開度門之後，見到入面有個好肥嘅女人抱住BB餵奶。個女人見到周海媚之後就好嬲咁瞪住佢，周海媚呆咗兩秒就即刻跑返去服裝間。
©TVB《最佳拍檔》
2. 馬六甲酒店鬧鬼
周海媚有次去馬六甲拍外景，咁啱佢姐姐都一齊去，佢哋就住同一間房。嗰時佢姐姐沖完涼坐喺梳妝台前面，而周海媚就坐喺張床上面望住佢姐姐，但佢望望下塊鏡就發現，坐喺佢姐姐後面嘅唔係自己，而係一個當地人樣嘅少女。佢當刻超驚，但太夜又唔想同其他工作人員換房，唯有涼都唔沖逼自己快啲瞓。
©TripAdvisor
3. 龍蝦灣靈異少女
嗰陣半夜三四點周海媚喺龍蝦灣拍完外景就揸車走，仲順便車埋一個髮型師走。佢哋揸到一個可以俾兩架車擦身而過嘅灣位嗰陣，咁啱隔離有架私家車駛過。因為咁夜好少車會入龍蝦灣，所以周海媚特別留意架車入面有咩人。佢見到架車入面坐滿晒人，而喺架車擦身而過個下，有個成個口又紅又大嘅女仔伸個頭出嚟對住佢哋笑。周海媚好驚，於是勁快揸去彩虹，之後再問先知原來嗰陣連個髮型師都見到個女仔。
©TVB《最佳拍檔》
林家棟聽完都話，所以佢哋夜晚出外景嗰陣無論點攰都唔會瞓，因為驚一瞓就會遇到啲靈異事件。
圖片及資料來源：TVB《最佳拍檔》
撰者: Kinnie
