試過飲醉酒嘅人都知道，有時第二朝真係會完全唔記得自己做過咩架～英國就有個男人William George Armstrong喺Twitter講佢飲醉酒後嘅經歷。
佢第二朝發覺唔見咗駕駛執照，佢諗咗好耐都諗唔起到底放咗喺邊，直至佢收到一封信，謎底終於解開喇～
佢收到一封航空公司嘅信，入面話好多謝佢選購去馬爾代夫嘅頭等機票，仲有埋詳細嘅行程時間同內容。
之後仲有埋價目表，提醒佢記住俾埋尾數！留意返，個單位係英鎊，即係成5萬幾港幣！
睇到呢封個嗰陣William真係嚇到面都青，正當佢諗住打去客服取消張機票嗰陣，佢發現信封入面仲有張小紙條。
原來成件事只係航空公司職員Steve嘅惡作劇，佢喺舖頭門口見到William嘅駕駛執照，就諗咗呢個方法俾返個駕駛執照佢。佢喺紙條上仲抵死咁講「如果下次放假，記住嚟我哋度買機票」，難怪好多網民都話呢個係好好嘅宣傳技倆喇～
之後William仲特登去舖頭搵Steve合照留念，睇嚟佢以後都唔敢亂飲酒喇～
圖片及資料來源：BoredPanda，Twitter
撰者：Kinnie
