2002年由火狗工房製作嘅愛神餐館，當時佢只是一款料理戀愛模疑遊戲。但喺十多年過去它終於來到現實，化身成為一間實體存在嘅餐廳降臨香港。呢間餐廳座落於官塘，並且隱身於工業中心入面。
唔好聽到工業中心就以為唔見得人，去到餐廳所在嘅樓層就會見到零舍與眾不同嘅門面。你會見到愛神餐廳的招牌同一個區大嘅人型立牌，如果喺愛神餐館嘅忠實玩家就會一眼認出，她係愛神餐館MAX內的其中一個角色娜芬蔕兒．丹特拉（Lavender Dentala）。
入到餐廳裡面就會先被一眾愛神餐館嘅周邊商品所震撼，除咗陳列之前推出嘅遊戲軟體外，仲有特別為咗今次愛神餐廳Beta公測店而製嘅杯墊等等。用餐區域更加能夠感受到愛神餐廳嘅氣氛，牆身貼上過往不同款式嘅宣傳海報，亦有幾款布製愛神餐館2嘅掛畫，以及接近等身大嘅娜芬蔕兒與茜琉璃‧派里溫高（Celery Periwinkle）人物易拉架。
喺遊戲入面我地嘅角色雖然係經營餐廳，但嚟到愛神餐廳我地就可以體驗到被服務一方嘅感受。服務員都會Cosplay變成遊戲入面嘅角色，穿著特別嘅餐廳制服。每一位都萌萌可愛的，上到嚟就記得要搵佢地合照。（圖為小雨）
而餐單當然有別於一般餐廳，設計充滿著愛神餐館個性。每一個餐也代表著一位遊戲角色，如果有自己鍾意嘅角色，叫返對應嘅餐都不失為一個選擇。每個餐都會包一杯嘢飲，而個杯墊就要抽喇，宜家去食仲會有隨機掛畫一幅同紀念會員證一張。
喺開幕禮當日火狗工房畫師aki同董事總經理彭子傑都有喺現場，特別為過往嘅作品簽名紀念。現場亦有發表感言，講述經驗接近20年火狗工房成長歷程。
之後更加有抽獎環節，由幾位火狗工房嘅幕後功臣抽出幸運兒。有一啲獎品更加係想買都買唔到，最珍貴嘅就數得上係抽畫師aki親簽所畫嘅角色簽名板。
喺開幕禮終結之前，仲有Cosplayer嘅才藝表演。當晚就有ukulele同埋結他嘅自彈自唱，日後開放嘅日子都有可能遇到佢哋嘅即興表演，絕對不容錯過。
愛神餐館係一款2002年開始推出嘅系列作，係以料理作為主題嘅戀愛模疑遊戲。喺Window、Xbox以及Playstation平台都有推出過愛神餐館作品，更曾經衝出香港推出過日文版本，人氣盛極一時。
【詳細】
愛神餐廳Restaurant Cupid - Beta公測店
營業日期：
正常開放日：10月6日，10月13日，10月20日，10月26日，10月27日
COSPLAY日：10月7日, 10月14日, 10月21日
閉幕日：10月28日
營業時間：晚上7:00 - 10:00
地址：觀塘道436-484號 官塘工業中心第三期4樓 T室 (鄰近觀塘D4出口)
費用：
普通日門票： $300 / 位
COSPLAY日 及 閉幕日門票： $500 / 位
小雨：Facebook
撰文：Oliver Fong
攝影：DSIUCHEONG
